Etholiad y Senedd 2026

Ar 7 Mai 2026, bydd Cymru’n ethol aelodau newydd o’r Senedd a Llywodraeth newydd i Gymru.

Mae hwn yn gyfle hollbwysig i osod hawliau dynol wrth wraidd y Senedd.

Mae pawb yn haeddu’r hawliau sylfaenol sy’n angenrheidiol ar gyfer bywyd da – tai, bwyd, gofal iechyd ac addysg.

Mae’r hawliau hyn yn rhyng-gysylltiedig ac yn ddibynnol ar ei gilydd er mwyn sicrhau safon byw ddigonol i bawb.

Ledled Cymru, gwelwn yr un heriau. Mae pwysau ar safonau byw wedi dwysáu ac mae anghydraddoldeb wedi lledu. Mae bywyd wedi mynd yn anoddach, gan adael llawer o bobl yn stryffaglu i sicrhau’r hanfodion sydd eu hangen er mwyn byw’n urddasol. Ond nid yw’r pethau hyn yn anochel. Maen nhw’n deillio o ddewisiadau gwleidyddol.

Gall etholiad 2026 fod yn adeg o bosibilrwydd yng Nghymru. Mae’n gyfle i ymgeiswyr ac arweinwyr pleidiau ganolbwyntio eu sylw ar yr hyn y mae pobl ei eisiau – sef camau ymarferol tuag at adeiladu Cymru fwy cyfiawn i bawb.

Mae pobl yng Nghymru eisiau gweld cymdeithas deg a gweddus lle nad oes rhaid i unrhyw un frwydro dros yr hanfodion. Mae bil hawliau dynol a fydd yn cyflwyno amddiffyniadau cyfreithiol cryf ar gyfer yr hawliau beunyddiol hynny yn gam hanfodol ar gyfer cyflawni’r dyfodol hwnnw.

Yn y cyfnod cyn etholiad 2026, rydym yn galw ar ymgeiswyr a phleidiau gwleidyddol i ymrwymo i gryfhau amddiffyniadau hawliau dynol.

Mae Amnesty International wedi cyhoeddi maniffesto hawliau dynol sy’n nodi ein galwadau ar Lywodraeth nesaf Cymru i greu Cymru fwy cyfiawn a mwy cyfartal.

Anfonwch neges e-bost at eich ymgeiswyr lleol nawr ac anogwch nhw i gefnogi Bil Hawliau Dynol yn y Senedd nesaf i amddiffyn hawliau pob dydd i bawb.